ഒരു സിനിമ സംവിധാനം ചെയ്യണമെന്ന് തീരുമാനിക്കുന്നത് എപ്പോഴാണ് എന്ന ചോദ്യത്തിന് മറുപടി പറയുകയാണ് സംവിധായകന്‍ ദിലീഷ് പോത്തന്‍.
ഒരു ഐഡിയ കേള്‍ക്കുമ്പോള്‍ തന്നെ അതിലൊരു എക്‌സൈറ്റ്‌മെന്റ് വരുമെന്നും അപ്പോള്‍ അതിനെ പിറകെ പോകുക എന്നതാണ് തന്റെ രീതിയെന്നും ദിലീഷ് പോത്തന്‍ പറയുന്നു.
‘ നമുക്കൊരു ഐഡിയ കേള്‍ക്കുമ്പോള്‍ തന്നെ അതിലൊരു എക്‌സൈറ്റ്‌മെന്റ് വരും. അപ്പോള്‍ അതിന്റെ പിറകെ പോകുക. ആ ഐഡിയ ഒരു കഥയായി ഒരു സിനിമയ്ക്ക് വേണ്ട രൂപത്തിലേക്ക് മാറണം.
എപ്പോള്‍ എക്‌സൈറ്റ്‌മെന്റ് നഷ്ടപ്പെടുന്നുവോ അവിടെ ഞാന്‍ ആ സിനിമ ഉപേക്ഷിക്കും. ഒരുപാട് തിരക്കഥകളില്‍ വര്‍ക്ക് ചെയ്തിട്ടുണ്ട്. പലതും പാതിവഴിയില്‍ ഉപേക്ഷിച്ചു. എക്‌സൈറ്റ്‌മെന്റ് നഷ്ടപ്പെടാത്ത മൂന്ന് കഥകളാണ് ഞാന്‍ സംവിധാനം ചെയ്തത്,’ ദിലീഷ് പോത്തന്‍ പറഞ്ഞു.
മഹേഷിന്റെ പ്രതികാരം നേടിയ വിജയമാണോ മുന്നോട്ടുള്ള ആത്മവിശ്വാസം തന്നത് എന്ന ചോദ്യത്തിന് മുന്നോട്ടുപോകണമായിരുന്നു എന്നും വേറെ നിവൃത്തിയൊന്നും ഇല്ലെന്നുമായിരുന്നു ദിലീഷ് പോത്തന്റെ മറുപടി.
‘ ഇതിനായി ബാക്കിയെല്ലാം വിട്ട് വന്നതാണ്. സിനിമയില്‍ നിന്നൊരു തിരിച്ചുപോക്ക് ഇനി സാധ്യമല്ല എന്നറിയാമായിരുന്നു. മഹേഷിന്റെ പ്രതികാരം ചെയ്യുമ്പോള്‍ നമ്മുടെ ആഗ്രഹം അടുത്തൊരു സിനിമ കിട്ടാന്‍ തക്കതായ വിജയം ഈ സിനിമയ്ക്ക് ഉണ്ടാകണം എന്നതാണ്.
ഒരു മാസം തിയേറ്ററിലോടുന്ന സിനിമ എന്നതായിരുന്നു സ്വപ്നം. പക്ഷേ മഹേഷ് അതിലും വലിയ വിജയമായി. ആ വിജയം കൂടുതല്‍ ധൈര്യവും അവസരവും തന്നു,’ ദിലീഷ് പോത്തന്‍ പറയുന്നു.
നിര്‍മാതാവ് എന്ന നിലയിലെ സിനിമയിലെ ഇടപെടലിനെ കുറിച്ചും ദിലീഷ് സംസാരിച്ചു. ‘ രണ്ടും രണ്ട് രീതിയാണ്. സംവിധാനം ചെയ്യുമ്പോഴാണ് ഞാന്‍ കഥയില്‍ കൂടുതല്‍ ഇടപെടുക. നിര്‍മാതാവിന്റെ റോളിലാകുമ്പോള്‍ ആ സിനിമയുടെ സംവിധായകനെ വിശ്വസിച്ച് മുന്നോട്ടുപോകും.
എന്നിലെ സംവിധായകന്‍ കയറിവരാതിരിക്കാന്‍ പരമാവധി ശ്രമിക്കും. നിര്‍മാണത്തിനായി ഒരു കഥ കേള്‍ക്കുമ്പോള്‍ കമേഴ്‌സ്യലി ആ സിനിമ എത്രമാത്രം വിജയിക്കും, എത്ര ബജറ്റ് വരും എന്നൊക്കെയുള്ള സാധ്യതകളാണ് പരിശോധിക്കുക,’ ദിലീഷ് പോത്തന്‍ പറയുന്നു.
Content Highlight: Dileesh Pothan about his Movies and Script Selection
